Totalbeløpet for rettskraftige inndragingar og erstatningar har auka frå om lag 107 millionar kroner i første tertial 2024 til 134 millionar kroner for same periode i år.
– Dette er ei vilja utvikling som viser at politiet har klart å vri merksemda mot inndraging i straffesaker, seier assisterande sjef, Inge Svae-Grotli, i Økokrim.
Eit viktig verkemiddel mot kriminelle nettverk
Det er eit kriminalpolitisk mål at straffbare handlingar ikkje skal løne seg. Inndraging er eit svært viktig verkemiddel mot kriminalitet. Økokrim meiner at å inndra utbytte i nokre høve kan motverke kriminalitet betre enn å sette folk i fengsel.
– Anten dei kriminelle handlingane gjeld narkotikalovbrot, miljøkriminalitet, arbeidslivskriminalitet eller andre lovbrot, er motivet som oftast gevinst. Tek vi pengane, øydelegg vi òg motivasjonen bak dei kriminelle handlingane, seier Svae-Grotli.
Politiet rustar seg i kampen mot kriminelle nettverk. Inndraging er òg eit viktig verkemiddel i dette arbeidet.
– Store beløp frå ulike kriminelle handlingar inngår i ein illegal økonomi som finansierer verksemda til kriminelle nettverk. Inndraging er derfor òg viktig for å få bukt med kriminelle nettverk, seier Svae-Grotli.
Politiet nyttar i større grad heile verktykassa
Dei ferske tala viser at paragrafen for utvida inndraging har vore nytta 62 gonger i første tertial. Til samanlikning vart den nytta 16 gonger i same periode i 2024 og 42 i 2023. Paragrafen vert nytta i saker der den domfelte allereie er straffedømd og gjentakande gonger har utøvd ny kriminalitet. I slike saker kan lovbrota knytast til kriminelle nettverk, narkotikahandel og annan alvorleg kriminalitet.
– Tala viser at vi klarar å inndra pengar også i alvorlegare saker der kriminaliteten er organisert og gjentakande, og at politiet i større grad nyttar høvet for utvida inndraging, seier Svae-Grotli.
Spesialetterforskarar på plass frå november
I november vil Økokrim vere på plass med nye spesialetterforskarar i seks regionar over heile landet. Dei skal dekke alle politidistrikta. Det er også etablert ei forsterka inndragingseining i Økokrim. Målet er å inndra meir verdiar frå dei kriminelle, for å motverke profittmotivert kriminalitet.
– Politiet over heile landet treng kompetanse, kapasitet og ei auka merksemd om inndraging. Vi forventar at inndragingstala vil auke i åra framover, og at arbeidet vil bli vesentleg styrkt frå og med november når spesialetterforskarane er på plass i regionane, seier Svae-Grotli.
Inndragingstala endrar seg i takt med at dommar vert rettskraftige. Rettskraftige dommar kan gje utslag på statistikk for både dette og tidlegare år.
Relevante saker:
• https://www.okokrim.no/oekokrim-etablerer-seg-over-hele-landet.6719018-549344.html
Kontakt:
kommunikasjon.okokrim@politiet.no
Tlf.: 23 29 10 30 (08.00–15.45)